Fakapotopotoga pisinisi o Tuvalu i ana polokalame
Ne tusi ne Silafaga Lalua
Te fakapotopotoga pisinisi o Tuvalu ko TNCC ko fai nei ana fakatokaga mo polokalame a ia i te fakaotiga o te tausaga nei, tela e aofia i ei ko te fono tausaga a latou i te po 30 o Novema mo te fonotaga akoakoga lasi tela ka fai i aso e tolu i te masina ma vau.
Te ofisa fakatonutonu fou o te fakapotopotoga ko Nakala Nia ne fai mai ki tala o Tuvalu me i sose tino ko silia mo te 18 ana tausaga kae isi sena pisinisi ko mafai o kau ki te fakapotopotoga. Te fono tausaga tenei ka fakatasi atu ki ei tino fai pisinsi kola ko oti ne togi a lafoga tausaga o latou.
Te fonotaga akoakoga tela ka fai mai te po 13 ki te po 15 o Tesema ka fakasaga o faipati ki luga i auala kola ka mafai ei o ola tutumau a pisinisi; kilokilo ki fakalavelave kola e fakafeagai mo pisinisi kae o titiimanatu foki ki auala kola ka mafai ei o fakaseai a fakalavelave kona, mo te kiloga ke teletele lei a pisinisi fakatele i loto i te atufenua.
A Nakala ne fai mai foki ki tala o Tuvalu me e manakogina malosi ko te malo ke galue fakatasi mo te fakapotopotga o atiake tulaga o mea tau pisinisi o te atufenua.
PALELE
