Fonotaga a matua mo faiakoga
Ne tusi ne Silafaga Lalua
A matua mo faiakoga o tamaliki akoga o te akoga lasaga muamua ko te Nauti Primary ne maopoopo ki te fakai o te akoga mo te fonotaga a latou i te fakaotiga o te tausaga akoga tenei.
Ne aofia i mataupu kola ne faipatigina i te fonotaga ko te mataupu ki luga i te tumaa o tamaliki i loto i te akoga mo te puipuiga mai masaki pisi e uke.
Ne pogai mai kona te fakatulafono te ave ne tamaliki taki toko tasi ne fagu vai mo fulu a lima ma oti ne kai, ne sololima taki tasi mo solo a lima, mo ne poola foliki mo tuku a meakai a latou.
Ne fakamalosi foki ne te pule faiakoga ko Temukisa Hauma ko matua ke fakamalosi olotou tamaliki ke moaa e inu valevale ki fagu mo ipu a tamaliki i te akoga.
A matua foki ne fakamalosigina ke fai ne taka mo olotou tamaliki fakatau ki masaki pisi i anufe kola e mafai o maua ne tamaliki mai te laukele.
A Temukisa ne siki tena fakafetai ki luga i matua, te Kaupule Funafuti motion katoa kola ne fesosoani mo te lago ki luga i te faiga akoga a tamaliki mo te akoga i te tausaga katoa.
Ne maua foki te avanoaga o te Fakapotopotoga o te Olaga Lei ko te TuFHA o fai atu sena akoakoga ki matua ki luga i alagaa galuega fesoasoani kola e mafai o maua mai i a latou, tausiga o te fafine me ko te matua ke malosi tena foitino, mo te titiigamanatu ki luga i te taaua o te sautala ki mataupu tapu i loto i kaiga taki tasi.
Ne fakaoti te tutonu ki te kaiga tela ne fakatoka ne te TuFHA mo faiakoga o te akoga.
PALELE
