Te kaumalaga a te ofisa o akoga ki Vaitupu
Ne tusi ne Silafaga Lalua
Te akoga lasag lua ko Motufoua ka fai tena ukuga failoga i te Aso Lima o te vaiaso nei kae ka fakamalugina ne te Ulu o te Atufenua mua ko Sir Tomasi Puapua.
Te aso tenei ko te toe aso foki loa mo te tausaga akoga tenei tela ka ma’laga atu ei tamaliki o foki ki olotou fenua i vaka e lua a te atufenua ko te Manufolau mo te Nivaga Lua, kola ka fakatali ke oti te faigamea.
Mai loto i te ulu ofisa o te akoga i Funafuti nei, ka ma’laga atu ei te pule o akoga mo tena kaumalaga ki Vaitupu o faipati mo te Kaupule o Vaitupu ki luga i te fakatuuga o faleakoga fou o te akoga lasaga muamua ko Tolise i luga i te fenua.
A latou ka fakatasi atu foki ki te tukuga failoga o te akoga.
E iloa atu ne tala o Tuvalu me i Vaitupu ko te toe fenua ka fakatuu ei faleakoga konei kola se vaega o te polotieki a te Iuniuni o Eulopa mo akoakoga o Tuvalu, kae ka fakaotioti i te tausaga ma vau.
Ka koi nofo a ia i Vaitupu, te pule o akoga ko Katalina Taloka ka takitaki ne ia te maakaaga o pepa sukega a tamaliki o vasega valu mo vasega ono maluga.
Te kaumalaga e aofia i ei ko tino katoa kola e fesoasoani ki te faitega o faleakoga mai te matagaluega fakatutuu, te savea, ofisa o te Iuniuni a Eulopa, ofisa mai te minisituli o malo o fenua mo ofisa ei mai loto i te minisituli akoga.
PALELE
