Ekalesia Kelisiano Tuvalu ne fauu ana faifeau
Ne tusi ne Yvette D’Unienville
Te Ekalesia Kelisiano Tuvalu ne fakatoka ne ia se lotu fakapitoa i te Fetu Ao lima i te taeao o te aso anafi mo te fauuga o ana faifeau e tokotolu.
Te failautusi aoao o te Ekalesia Kelisiano Tuvalu faifeau Kitiona Tausi ne fai mai ia latou konei ne aofia i ei te faifeau Taualo Penivao telaa ne maua tena tikulii i akoakoga faka te lotu mai te akoga fakafaifeau ko Kanana Fou i Samoa, mo te faifeau Telala Noa mo te faifeau Ionatana Ionatana kolaa ko iku mai i te akoga fakafaifeau ko Davuilevu i Fiiti.
Te faifeau Telala ne maua tena tipiloma i akoakoga faka te lotu kae ko te faifeau Ionatana ne maua ne ia te setifiketi.
Te Ekalesia ko oti ne kalagagina ne ia a te faifeau Taualo ke fai mo faifeau fesoasoani i te akoga o Feutvalu ke oko ki te tausaga fou telaa ka fai ei a ia mo faifeau o te Fetuvalu.
Te faifeau Telala ko ia nei te faifeau fesoasoani i te polokalame talai a te Ekalesia kae ko ia foki nei a te faifeau mo uaafu mo kauvaka.
Ko te faifeau ko Ionatana ka fanatu ki Niulakita o tausi te kaulotu i ei.
A latou konei ka galue mo se faa tausaga i galuega konei ko oti ne kalagina ki ei, i pati a te faifeau Kitiona.
Palele..
