Fakasologa o alagaavaka mo te 2007
Ne tusi ne Silafaga Lalua
Te matagaluega a malini ko oti ne fakatoka ne ia a alagaavaka mo vakamutu e lua a te atufenua ? Nivaga Lua mo te Manufolau.
Te Malaga muamua a te Nivaga Lua mo te tausaga ma vau ka fano i te vaiaso i te lua o Ianuali ki fenua i te kogaloto, ako te Manufolau ka fano tena Malaga muamua ki fenua ki matuu.
A vaka e lua ka olo atu i te po 13 mo te po 15 o te masina foki o Ianuali ki fenua katoa o puke tamaliki akoga Motufoua o ave ki Vaitupu.
I te po 23 o Ianuali foki loa ka fanatu ei te Nivaga Lua ki Suva o tuku tamaliki akoga i tua atu, kae ke aumai foki a kakoo o te polotieki a Amatuku mai Suva.
Te Malaga i te lua ki Fiiti o fakaoti tamaliki akoga ka fai ne te Manufolau i te vaiaso muamua o Fepuali.
I te vaiaso muamua mo te lua o Mati 2007, a vaka e lua ka olo atu ki fenua katoa o puke a sui ki loto i te fale Palamene o aumai ki Funafuti nei.
Te matagaluega e fakamasaua mai me ka isi se fakamafuliga ki te alagaavaka tenei mafai ko fakapatonu mai a taimi e fano ei te Nivaga Lua o fai ana mea masei i Taiwan, i se taimi o masina e tolu ki mua o te tausaga 2007.
Palele
