Komiti fai laisene meainu malosi
Ne tusi ne Silafaga Lalua
Te komiti fai laisene o meainu malosi ne fono i te aso anafi mo tino kola ne fakatagi ki ne laisene togi meainu malosi mo latou i te tausaga 2007.
Te sui takitaki o te komiti ko Seve Lausaveve ne fai mai ki tala o Tuvalu me e toko-sefulufaa tino ne fakatagi atu ke fakafou olotou laisene kae isi foki ne tino fou ne fakatagi mo ne laisene mo sua tausaga.
I te fono ne faipati ei te komiti mo tino fakatagi ki luga i lipoti a te komiti ki luga i koga togi meainu malosi a latou kola ne saveagina ne te komiti. Ne fakasaga foki te komiti o toe iloilo olotou manakoga koi tuai o fai se taliaga o te laisene.
Ko te fale togi meainu malosi ke fai fakalei, ke isi se koga lei e tausi ei meainu malosi, pela foki mo te fale foliki ke isi i loto i fale kava ? ko nai tapula kola ne fakamoegina ke isi i te koga togi kava koi tuai o mafai o maua ne se tino fakatagi mo se laisene a tena laisene.
Te laisene e tusa mo te tausaga e tasi tena leva, kae e mafai o tapale te laisene o sose tino togi kava manafai ko maua atu ne te komiti me ko isi ne fakanofonofoga o te laisene togi meainu malosi ko oti ne fakaseaoga ne te tino togi meainu malosi.
Te komiti tenei eaofia i ei e tokotolu ofisa mai te malo, kae tokolua mai fakapotopotoga se kau i te malo.
PALELE
