TUVALU-NEWS.TV

Ne fakaasi aka ne te Failautusi o te Maalo, Panapasi Nelesone, me ko talia nei ko te Manufolau ke na tala atu ki Fiiti, ko te mea ke na sopo mai iei tino Tuvalu kola ko fia faimalaga mai, kae maise ko tamaliki akoga.

I te vaaitaimi nei, I fesokotakiga a te Ofisa ote Ulu ote Malo mo te Ofisa ote Sui Maluga o Tuvalu I Fiiti, ne fakaasi aka ne te Tokolua Sui Maluga o Tuvalu I Fiiti, Samuelu Laloniu, me ko oti nei ne fai te fakamaugaa igoa o tino Tuvalu I Fiiti fakatasi mo olotou fakatuatusiga mo napa o olotou telefoni, ko te mea ke faigofie te fesokotakiga mo latou I taimi o fakalavelave tupu.

Ne fakaasi aka foki ne Samuelu, me e seki ai ne fakalavelave kai lavea atu, e ui loa ko teka te taimi tela ne tuku atu ne te Pule ote kau Tau o Fiiti ke maua mai se tali ki ana manakoga mai te Maalo o Fiiti.

Ne fai pela me ko te 12 ite tutonu nei e tau ei o maua ne te kautau se tali mai te malo. Ona ko te fakanofoga tena, tela ne pono iei a te Akoga Maluga o te Pasefika ki Saute I Suva I te afa ote 11 ite taeao nei, e pela foki mo nisi akoga aka I Suva.

Ne fakaasi aka ne te Pule ote kautau o Fiiti me onala e seki ai loa se tali mai te Maalo o Fiiti ite Vaaitaimi nei, tela e fakatasi mai iei me ko takia koa ne te Maalo ke fakataunumanakoga o latou te kautau. Iana pati foki, me e se kamata ma po nei o fakataunu a mafulifuliga kola e manako latou o fai, me ite po nei e fai te paati fiafia a latou mo te kau pulisimani ona loa me ko oti manuia te olotou fepakiga ite lakapi, ite aso nei.

E aofia I manakoga o te Kautau o Fiiti ko te Ulu ote Malo, Laisenia Qarase ke lisaina mai tena tofiga; ke tapale a tulafono e tolu kola e tau atu ki te tapalega o te Maalo i te 2000; kae ke fakagata fakavave te feagaiga galue a te Pule o Pulisimani, tela se tagata Ausitalia, me fakamasei fua ne ia te vaa lei o te Kautau mo Pulisimani

PALELE