Pulisimani Tuvalu ko salasala fakalei ki tino fakaoga vailakau malosi
Ne tusi ne Silafaga Lalua
I te malologa tenei o te Kilisimasi e tokotolu tamataene Tuvalu ne pukegina ne pulisimani mai tua o te iloiloga kae maua atu me ne fakaoga ne latou kae isi foki ne vailakau malosi e fai pela me ne marijuana I luga I te tokotasi o latou, I te po o te Aso Gafua po 25 o Tesema, 2006.
A pulisimani mo tino galue o tiute o kakoo ne galue fakatasi I te Malaga taluai a te Manufolau tela ne taunu mai ki Funafuti taluai, o suke a kope o tino o sala kin e vailakau malosi kola ne mafai o funa main e pasese, kae ne seki ai ne olotou mea ne maua.
Kae mai luga I lipoti mo tala fai a tino me isi ne talavou e fakaoga ne latou vailakau konei, ne ala ei o toe fakasoko a iloiloga a pulisimani tela ne iku loa ki te maua o tamaliki tagata konei.
I muna te sui pule o Pulisimani ko Motulu Pedro me I a latou fakatasi mo ofisa suke kope.kakoo e fakalagolago malosi la ki luga I tino mo olotou tala manafai e isi ne olotou masalosaloga I tino fakaoga vailakau malosi.
I ana pati me seai nei se fesoasani o pulisimani e maua mai masini io me ne kuli sogi mea penei, ona la me se toka I Tuvalu nei tela la latou e fakalagolago malosi eiloa ki olotou mea ne tauloto I akoakoga sii fain e latou, kola e aofia I ei ko te matematega o te vailakau tenei ? tela se lau. Latou ne akoga ki te sogiiga o te lau, te tunuga kae ‘sogi latou me manogi pefea, kae maise I ei ko te onoono latou ki lau mai mea fakaata me kese loa foliga o te vaega lau tenei.
A vailakau kola ne maua aka I se tokotsi o te tokotolu kola ne maua I te Aso Gafua ko oti nei ne fai a fesokotakiga ki Ausitalia, Niusila mo te Ulu ofisa o te Forum mo se fesoasoani ki te fakapatonuga me ko te marijuana loa me ikai, koi tuai o ave te tokotolu konei ki te fono.
I te vaitaimi nei ko oti ne fakasaoloto te tokotolu konei ke oko ki taimi e fai ei te fono.
I muna a Motulu me se tasi o ana palani ke avaka ki te malo ke talia mai ke fai se feagaiga I te va o pulisimani Tuvalu mo pulisimani Fiiti ko te mea ke fai se sukesukega maea o kope o tino takitokotasi mai Fiiti koi tuai o tiaki ne vakamutu a Fiiti I sose taimi.
I te feitu tena ko fakafoliki ei te mafai o aumai ne tino a vailakau penei I luga I vakamutu io me ko vakalele kola e aumai ki loto I Tuvalu. Ko oti ne avaka te mataupu tenei I loto I te palamene malu o te atufenua tela ko fakataua kii net e galuega pulisimani te lei mo te tokaga malie o olaga o ana tino.
E fakatagi atu foki a Motulu ki sose tino tela e isi sena fakamatalaga e uiga mo te keisi tenei io me ko sose keisi I mea tau vailakau malosi I Tuvalu nei, ke fakailoa atu ki pulisimani ke fakatau fesoasoani tatou ki te fakafolikiga o fakamaseiga a vailakau malosi konei ki tou talavou.
PALELE
