Te Chamber of Commerce
Ne tusi ne Silafaga Lalua
A tino fai pisinisi i Tuvalu mai lalo o te fakapotopotoga mo pisinisi foliki ko te Tuvalu National Chamber of Commerce TNCC, mafai ko fakatagi atu latou kin e kaitalafu mo fakatele olotou pisinisi mai pangike.
I te fonotaga a te TNCC tenei ne fai i te vaiaso ko teka, ne lavea aka me ko tupe te fakalavelave lasi e fakafeagai mo tino fai pisinisi i loto i Tuvalu.
Te ofisa o fesokotakiga o te fakapotopotoga ko Nakala Nia ne fai mai ki tala o Tuvalu me i te tupe fesoasoani a Taiwan mo pisinisi foliki tela e aofaki ki te 400 afe talaa, ko oko loa te faigata o maua ne tino fai pisinisi ona ko tapulaa kola e fakatuu e pangike ke fakamaua muamua ne latou.
Ne iloa aka ne tala o Tuvalu me i tino fai pisinisi e fia fai sena kaitalafu mai te pangike atiake ko te DBT e tau o togi ne ia te 35% o te aofaki manakogina; e tau o isi ne kope e fakamautinoa ei tena kaitalafu; kae tau foki o isi ne tino kola e molimau me ka fesoasoani latou ki te togiga o te kaitalafu manafai ko isi se fakalavelave ki te pisinisi.
I te fakasautalaga o te menetia o te pangike atiake ko Taukave Poolo ne fai mai ne ia me kafai e isi se tusaga o te tino kaitalafu ki tena kaitalafu, ko tena uiga e isi foki sena loto o fai fakalei tena pisinisi kae togitogi foki tena kaitalafu ke magalo.
Ne fai aka foki ne ia me i sose atiakega tau tupe e tau loa o isi ne aofaga kola e puipui ei, tela la te pangike atiake a manako loa ke isi ne mea e puipui ki ei ana tupe kola ka fakakaitalafu ki tino fai pisinisi.
Te faifaiga tenei e lasi tena pokotia ki tino kola e seai ne olotou tupe teu io me ko PF, ke fakamautinoa io me puipui ki ei olotou kaitalafu.
I pati a Taukave me i te fakamafuliga o tulafono ki vaega puipuiga o kaitalafu konei e pakuu loa ki luga i te komiti o te pangike, kae ko te komiti e taumafai o kilokilo ki te lei o te tino fakatagi pela foki mo te pangike.
Palele
