120 afe mo togi a fale nofo o tin ogalue a te malo
Ne tusi ne Silafaga Lalua
E 120 afe talaa ko oti ne fakatalia ne te malo mo togi a fale nofo o ana tino galue mo tausaga nei.
Olioliga Iosua, te sui failautusi mo te matagaluega mo te fakasoasoaga o galuega mo akoakoga ne fai mai ki tala o Tuvalu me i te 120 afe tenei ko tapolo i ei te aofaki ne tuku mo togi a fale i te tausaga ko fano.
E tino lua mo te tokofitu tino galue fou ko oti ne fakatalia ke kau mai lalo o te polokalame tela e fesoasoani ki ei te malo i te togiga o olotou fale.
Te 27 tenei ne maua o avanoa ona ko tino galue kola ne nofo mua i ei ko olo atu ki fale loa a te malo, io me ko isi loa ne fale totino o latou, faopoopo ki te 23 mai tausaga ko fano.
E 4 fale i avanoaga konei ko avanoa ona ko tino galue kola ne nofo i ei ko litaea i te tausaga nei.
Te aofaki o tupe a te malo e togi ki luga i fale konei e fakanaa loa ki luga i te peofuga o te tino galue mo te vaega fale tela e tau a ia o nofo ki ei pela mo fakanofoga kola e tau ki luga i levolo o peofuga o latou.
Ne fai mai ne Olioliga me e silia atu i te tino lau tino galue koi manako ki ne fale mo nofo kae ona ko te fakalavelave ki te se lava fale i luga i Funafuti nei, ko ala ei o se mafai ne te tino lau tenei o maua ne fale.
E iloa ne tala o Tuvalu me i te tino galue ka manako ki se fesoasoani o te malo i te togiga o tena fale, e tau o tusi tena tusi fakatagi ki te matagaluega tenei, kae e maua tena fale mafai ko katoatoa i a ia mea e manakogina.
Te leva o taimi o tena galuega, aofaki o tena kaiga, tena togi mo te taimi ne tusi ei tena tusi ne mea katoa kola e iloilogina koi tuai o avatu te fesoasoani o te malo ki ei.
Palele
