AMAKA CLUB - ma manako koe ki lima malosi
Ne tusi ne Silafaga Lalua
A kaiga kola e uke olotou galuega faka kaiga e ma’nako ke fai kae see tii lava taimi mo fai ko mafai nei o see manavasee, ona ko galuega a se potukau tamaliki tagata.
Te Amaka Club se potukau a tamaliki tagata Funafuti mai te fakai ko Alapi kola e ma’nakao o fesoasoani ki sose kaiga e isi ne ana galuega e fia fai, mo se togi foliki.
Te takitaki o te kalapu ko Maika Maika ne fai mai ki tala o Tuvalu me i a latou ko oti nei ne ga’lue mo ne masina e 8, kae lasi kii te manakogina o olotou galuega fesoasoani.
Ne fai mai foki ne ia me i aso nei ko uke kii a mea e fai mai tafa o galuega i ofisa mo fale, tela la galuega kola e tau o fai i fale e tuku faeloa ke fakamuli kae se tii maua taimi o fai ei, tiga te taaua mo te manakogina.
Naai galuega e fai ne te Kalapu tenei ko te fakatoka te fatoaga, faite lulu puaka, tali kaiga, mo te faite o umu nofo.
I pati a Maika me i te tino e a ia te galuega e togi fua ne ia mea manakogina pela mo kaiao, one mo te pui mo te fatoaga, pela foki mo one mo kilikili mo saipuaka.
A galuega ‘mafa katoa e panaki katoa loa mo latou.
E fakataaua ne Maika te fesoasoani o latou ki sose tino e manakogina ke na fai tena galuega faka-kaiga kae seai sena taimi.
E fakamoemoe a ia ko te tausaga nei ke lasi te fesoasoani o te kalapu e fai ki kaiga valevale kae maise i ei ke fanofano lei te pisinisi auaa fakamoemoe ke mafai o togi a mea faigaluega kola e manakogina ke fai ki ei olotou galuega.
A tino koi fia maina i te kalapu tenei e mafai o maua ne latou tamaliki tagata i te telefoni 91 451.
Palele
