Fafine manakogina ke kau ki tofiga fai tonu
Ne tusi ne Silafaga Lalua
E tokouke atu fafine Tuvalu e manakogina ke taofi ne latou tofiga fakatonutonu maise i fenua i tua o te laumua.
I aofaki mo fakamatalaga kola ne maua mai fenua i tua o te laumua taluai nei, te aofaki o fafine kola e nofo i loto i Kaupule mo tofiga fai tonu e foliki kii loa.
E tokolua fafine galue i loto i te matagaluega a fafine ne olo atu ki fenua i tua o fakamau a aofaki mo fakamatalaga o fafine mo tagata galue i Kaupule, pela foki mo aofaki o vaega komiti i loto i Kaupule taki tasi.
A Lionola Eliapo te Ofisa galue mo fafine ne fanatu ki fenua ki matuu o fai ei te galuega ako Lupe Tavita te Ofisa fai tala o te matagaluega ne fanatu ki Kaupule o fenua ki te kogaloto.
I pati a te pule o te matagaluega o Fafine me manakogina a aofaki konei mo fakatoka database io me ko aofaki katoa mo fakamatalaga o mea katoa kola ka tuku atu ki te tino tela ka vau i te masina fou o fai te akoakoga ki luga i fakamatalaga mo aofaki o tino kesekese.
A Saini ne fai mai me i te matagaluega o aofaki mo fakamatalaga e se lava i a latou a fakamatalaga kola e manakogina mo te akoakoga tenei ka fai.
E iloa ne tala o Tuvalu me i a Lionola ka fanatu ki fenua ki sauté o fakaoti te galuega tenei i te sua Malaga a te vaka ki kona.
Palele
