Fakalavelave tau iti i Nukulaelae
Ne tusi ne Silafaga Lalua
A tino fakaoga te it ii te fenua ko Nukulaelae ko faka-agai nei ne latou fakalavelave ki luga i te iti mo te lua vaiaso ko teka atu nei.
Leata Loleni ne fai mai tena lipoti mai te fenua me mai te 18 itula tela e masani o kaa i ei te iti, ko oti ne toil ki lalo i te 7 itula, kamata mai te itula e 1 i te tutonu ki te 10 i te po, ona ko te fakalvelave.
Te fakalavelave tenei e mafua mai luga i te se lava o tisolo mo fakaola te iti.
Leata ne fai mai me uke a pokotiaga o te fakalavelave tenei e aofia i ei ko vailakau i loto te fakaimasaki, kope tau aisa o kaiga, meakai aisa i loto i te Fusi kae pela foki mo tino galue i te Kaupule ko se mafai o galue i komipiuta a latou ona ko te mea tenei.
E iloa ne tala o Tuvalu me i te vaka ko te Manufolau net au o fanatu ki Naukulaelae i te tutonu o te Aso Ono ko teka kae ne fai mai ne Uale Sinapati te Sui Pule o Malini mo Uafu tau vaka ona ko tena uanisi ne masei ne ala ei o se fakataunu tena Malaga.
I pati a Uale me i te Matagaluega fakatutuu a te malo e gfaite nei ne ia te mea masei tenei kae fakatautau ke oti i te po nei.
Ka fai ko toka te feitu tenei ko mafai ei o fano te vaka ma taeao. I ana pati foki me kafai se toka te feitu tenei, e mafai loa o fano te vaka taeao ona ko te manakoga lasi o Nukulaelae ki tisolo kae ke sopo mai foki ei tamaliki akoga.
Te Kamupane iti ne fai mai tena fakamatalaga me ko oti loa ne ave ki tai i te vaka a te kakoo tisolo a Nukulaelae. I olotou muna me ko te vave o te vaka o fano, ko te vave foki o seai se fakalavelave tenei.
Palele
