Kaiga o kauvaka fakatalitali ki tala o fanau
Ne tusi ne Yvette D’Unienville
A kaiga o kauvaka kolaa ne puke me tuku taumate me aveave ne laua a vaialakau malosi io me ko drugs e fakatalitali nei ki ne tala e uiga mo laua konei.
A laua konei ne galue I te vaka ko te MV Green Chile.
Ne mafai o maua ne tala o Tuvalu a tusi fakailoa ki te Kampane fakamaua avanoaga kauvaka TMS e uiga mo te fakamalolo o te tokolua kauvaka konei mai laa feagaiga galue.
E pelaa mo tusi konei, I te po 22 o Tesema 2006 i te taimi ne tau I ei te vaka i Moin - Costa Rica, ne puke te tokolua kauvaka konei ne pulisimani ona e tuku taumate me aveave ne laua a vailakau malosi kae ne maua a vailakau malosi i te fokiiga a laua ki tai i te vaka.
Te Menetia o te TMS Amuia Tapeva ne fakapatonu mai ne ia te feituu tenei, kae ne fai mai me siki toe ai loa ne tala aka ke maua ne te kampane e uiga mo te tokolua konei, telaa ne avatu te fakailoaga ki te Minisituli mo maloo ki tua atu ke mafai o fai ne sokotakiga faka te maloo.
Te sui Failautusi o maloo ki tua atu Eseta Lauti ne fakaasi aka ne ia me ko oti ne fai te sokotakiga ki te Ofisa o Amelika mo se fesoasoani ke sala aka ne tala e uiga mo te tokolua kauvaka Tuvalu konei.
Ne fakamaina mai ne ia me ona laa a Tuvalu e seai sena vaa fakataugasoa mo Costa Rica, kae seai foki se sui o Tuvalu i konaa kae ona ko Costa Rica se maloo o Amelika telaa ne avatu I ei a te fakatagi tenei ki te Ofisa o Amelika.
Pelesitene o te Iunioni a Kauvaka Tuvalu ko te TOSU ne fai mai foki me fakatali foki nei latou ki ne tala fou e uiga mo te tokolua konei.
E see mafai ne tala o Tuvalu o taku a igoa o te tokolua kauvaka konei ona ko tulafono tau tusitala.
Palele
