Kaiga o Soloseni ne togi te CD pese fou a latou
Ne tusi ne Lina Malaki
Te kaiga o Soloseni, ne fai te fakatagitagiga fakailoa a latou mo te fakatau atu o lotou CD pese fou kola ne fatu kae usu foki ne te tokolua I loto I te kaiga I luga I te laumua nei I te aso nei.
I pati a Eseta Soloseni ki Tala Tuvalu i ana tamaliki tagata Takashi tela ko lua sefulu tasi ona tausaga mo Starchel tela ko sefulu valu ona tausaga ne fanau mai loa mo te laa taleni usuusu pese.
A laua foki konei ko leva foki loa ne usuusu mai taimi ne foliki ei a laua, i pati a te laa matua kae ne mafai foki ne laua fakatasi mo te laa tuagaene foliki o tai fakalei atu a lotou taleni konei mai te fesoasoani o te olotou tamana.
A pese fou konei ne tusi i tausaga e lua ko teka atu nei kae usu foki loa ne te tautaina konei kae ne mafai ne laua o fakatoka se aofaki o pese i masina fakaoti o te tausaga ko teka mai te fesoasoani o te laa fakatamana Albert Seluka telaa e taa ne ia a te keyboard.
Ne fai mai ne Eseta me ne mafai ne latou o fakatau atu ki tua I tino a cd pese fou konei e tusa mo te lua selau I te taeao I te Funafuti Fusi kae ne toe fakasoko atu i te fakatutonu i te fale fiafia ko te “PAPEN” telaa ne igoa muamua ki te Lucky Set Club.
A pese fou konei e fakamuna ko te “PAKASOA”.
Ne toe fai foki te fakatagitagiga o pese fou konei I tai te fale talimaaloo ko te Vaiaku Lagi i te afiafi nei.
Palele
