Kaulotu o Lofeagai
Ne tusi ne Lina Malaki
E tigaa ne totoo a ua kae agi te matagi I te aso anafi, ne fakataunuu loa a te pikiniki a te kaulotu o Lofeagai i te fale pikiniki o Livi, I te feitu ki matuu o te fenua.
Ne lipooti mai ne se tokotasi i te pikiniki ne fakapitoa loa mo tamaliki akoga katoa I Lofeagai mai akoga kamatake oko ki akoga maluga.
Te pikiniki foki loa tenei e fakamaavae foki loa ki tamaliki kola ka foki atu ki akoga I Motufoua mo Fiiti.
Te kaulotu ne fakatasi atu a latou mo te inugaa tii a latou I te 6.00 I te taeao.
Ne fai te lotou bbq i te tutonu kae isi foki se lotou puaka tao ne fakatoka ne te faifeau o te kaulotu ko Sioraoi Opeta.
Mai tua o te kaiga tutonu ne fai a tafaoga I loto mo tua o te fale I tamaliki foliki, tino matua, tamataene mo tamafine.
Te polokalame pikiniki ne oko loa ki te afiafi telaa ne fakafoki I ei latou ki fale i te pasi o Fetuvalu mo te motoka a te ‘tofi o te fakai.
Palele
