Loia o tino ko seai
Ne tusi ne Silafaga Lalua
Te loia o tino i Tuvalu nei ko seai.
Tala o Tuvalu ne iloa atu ne ia me i te loia o tino tenei taluai ko oti ne lisaina mai tena galuega.
Lipoti mai te sui Loia o te Malo ko Eselealofa Apinelu ne fai mai me ko oti ne avatu te fakatagi ki te AusAID mo ne loia ke fesoasoani i te olotou ofisa.
Te ofisa ne fakatagi mo ne loia e tokolua. Se loia fesoasoani i mea tau tulafono ke galue i te ofisa o te loia o te malo, mo se loia o tino.
Te AusAID ko oti ne talia ne ia te fakatagi kae i taimi nei koi fai tena fakasalalauga ki ne loia e fiafia o galue i konei.
I muna a Ese me i te taimi e oko mai ei loia fou konei e se iloa tonu vagana ke fakailoa mai ne te AusAID.
I te taimi nei a tino e ma’nako ki te fesoasoani o te loia o tino koi mafai loa o olo ki te ofisa kae ka fakamau katoa olotou manakoga ne te kilaaki o te loia o tino tela ko iloa katoa ne ia mea e tau o fai.
Ko manakoga fua kola ko manakogina malosi i ei te loia, ka fakaoko atu katoa ki te ofisa o te loia o te malo.
Te avanoa o loia e tokolua i te ofisa tenei e se taku tonu mai ne Ese me maua faeloa ne tino e ma’anko ki ei ona ko te uke o mea kola e tau o fai i aso taki tasi.
Palele
