Palani galue a te minisituli o malo o fenua
Ne tusi ne Silafaga Lalua
A matagaluega katoa mai lalo o te minisituli o malo o fenua ko oti ne avatu olotou palani galue mo masina e tolu muamua o te tausaga nei.
Te sui failautusi o te ministuli ko Fanoanoaga Patolo ne fai mai ki tala o Tuvalu me i palani galue o matagaluega e fitu mai lalo o te minisituli ne avatu i te Aso Gafua o te vaiaso nei.
I pati a Fanoanoaga me i palani konei e fesoasoani ki te iloiloga o te mafai o galue ‘lei o matagaluega taki tasi.
Te sua mea e fai mai tua nei ko te kilokilo o latou ? e aofia i ei ko te minisita, sui failautusi mo te failautusi fesoasoani o te minisituli ki palani takitasi, o onoono me pefea te mafai o latou taki tasi o fakataunu a polokalame io me ko mea fai kola ko oti ne tusi mai i loto i olotou palani, mo te tolu masina muamua o te tausaga.
Te mea nei e taaua kii loa ki te fakataunuga o galuega manakogina ke fai mo te teletele lei o matagaluega taki tasi kae maise te minisituli katoa.
E iloa ne tala o Tuvalu me i te minisita e galo i te vaitaimi nei kae i muna a Fanoanoaga me ka fai te iloiloga a latou ki palani konei manafi ko oko mai tena Malaga.
Palele
