Rural Development execute project requirements
Ne tusi ne Silafaga Lalua
Mai taumafaiga ke fakamalosi tulaga o taupulega lei i fenua, a tino poto i mataupu konei i loto i te matagaluega mo Atiakega o Fenua i te minisituli o Malo o Fenua ko fai ne ia akoakoga mo tino i fenua i tua atu o Funafuti.
Albert Seluka te tino poto i mea tau tulafono, mo Lutelu Faavae te tino poto i mea tau aofagaaga o tupe ne faimalaga atu ki fenua ko Nui mo Vaitupu o fai akoakoga i ei.
A akoakoga ka fakasaga ki luga i te fakaakoakoga o sui o Kaupule mo Fale kaupule pela foki mo tino galue o Kaupule mo sui ei o tino valevale i te fenua.
Ne fai mai ne Iete Avanitele me i te akoakoga ka lasi loa ki luga i te atiakega tulaga o te malamalama i te Tulafono mo Falekaupule, fakamalosi te mafaufauga mo taupulega lei mai lalo o te Tulafono o Saolotoga pela foki mo te tulafono mo mea tau pisinisi.
A Albert mo Lutelu ka nofo aka i luga i se fenua e tasi mo se leva e lua ki tolu vaiaso o fai te akoakoga.
I muna a Iete me i te akoakoga ko oti ne fai i Nanumaga mo Nukufetau i masina o Oketopa mo Novema i te tausaga ko fano.
I ana muna foki me i te mea nei se polokalame taaua e tasi mo te polotieki ko te “Fakamalosiga o pulepulega faka fenua” i te tausaga nei.
Te polotieki e lua ana tausaga kamata i te tausaga 2005, kae togigina ne te polokalame atiake a Malo Soko ko te UNDP. Te polotieki e tau o oti i te tausaga nei kae i muna a Iete me e isi se fakamoemoega ke fakasoko atu taimi e oti ei.
Palele
