Savali a te TANGO ki te ministituli
Ne tusi ne Silafaga Lalua
Te savali a te Fakapotopotoga a fakapotopotoga se kau i te malo o Tuvalu ko te TANGO ne fanatu te olotou savali ki te minisituli o malo o fenua i te vaiaso i te lua o te masina nei.
Te savali ne fakasino tonu ke fetaui ei te TANGO mo te minisita fou, kea vatu ki ei te Fakavae o te TANGO mo tena palani fakagalue saukatoa mo tausaga 2005 ki te 2008.
Se gata i kona ke faipati foki latou ki luga i mataupu e tau tonu kae taaua ki te fakapotopotoga, tino e kau mai lalo i ei mo tino Tuvalu katoa.
Te TANGO ne fakatagi atu foki ke mafai o avaka te tulafono fakatautau mo fakapotopotoga se kau i te malo i te sua fonotaga a te Palamene.
Ona ko te timomo o avanoaga i loto i tulafono a Tuvalu ke maua o laisene a fakapotopotoga se maua sene, ne ala ei o gasue te TANGO ke faite se tulafono fakatautau ke fakagaluegina.
E tokouke a tino mai fakapotopotoga penei pela foki mai te malo, fafine mo talavou ne aofia katoa i te faiga sautalaga, akoakoga, mo fono i te taumafaiga ke faite te tulafono fakatautau tenei.
I pati a te pule o te TANGO ko Annie Homasi me ne kamata te mea nei i te 2001.
Te ulu ofisa o te Forum ne lavea ne ia te manakoga lasi kae taaua tenei tela ne talia ei ne ia ko tena tino galue ko Mose Saitala ke fesoasoani ki te TANGO i ana sautalaga mo tino kesekese.
I muna a Annie me ne avatu ne ia te kopi o te tulafono fakatautau ki te minisituli i te tausaga ko teka kae ne fakasoko loa ia o galue fakatasi mo te ofisa o te loia o te malo ki manakoga ki luga i te tulafono fakatautau.
Te savali ne iku ki te talai ne te minisituli ko te minisituli ke galue fakatasi mo te TANGO ki te fakatokaga o te tulafono fakatautau tenei ke toka mo te Palamene i te masina o Mati i te tausaga nei.
Palele
