Scholarship i tausag ko fano
Ne tusi ne Silafaga Lalua
E tai tokouke foki loa tamaliki kola ne akoga i olotou tausaga muamua loa i tausaga ko fano, ko oti ne fakaseai olotou polokalame akoga io me ko scholarships.
I pati a te failautusi o akoga mo tafaoga ko Solofa Uota me kafai e fakapau taumafaiga a tamaliki i tausaga ko fanatu ki te tausaga nei ko oko loa i te masei taumafaiga a tamaliki konei ne fatoo olo i tausaga ko teka.
I pati a Solofa me i tamaliki ko se ‘saga tonu ki olotou mea akoga, kae maise ko lasi te asolotoga ko maua ne latou i te nofo i Fiiti, kae ko se masaua ne latou te pogai muamua ne olo ei latou keaea mai Tuvalu.
Ne toe fai mao foki ne Solofa me i tamaliki konei ne tamaliki ne lei kii i te akoga ko Motufoua pela foki mo te polokalame vasega fitu maluga i konei, kae oko atu ki akoga, ko pa’kuu katoa loa olotou kai mo olotou taumafaiga ki lalo.
Ne fakamatala aka ne ia me kaati niisi tamaliki ko manatu mai ki olotou matua, fakatasi ei mo te kese o te koga mo te enivalomene o te koga ko nofo i ei.
Ne iloa atu ne tala o Tuvalu me i tamaliki katoa ne maua olotou avanoaga akoga i tausaga nei ne avatu katoa ki ei se kopi o tulafono o fakanofoga o avanoaga a Tuvalu, ko te mea ke fakamasaua faeloa ki a latou olotou mea e tau o fai ke lei ei tena akoga mo tena polokalame.
Palele
