Tafaoga muamua a te futipoolo 2007
Ne tusi ne Silafaga Lalua
A tino tafao futipoolo katoa ka lasi te fiafia o latou me ka kamata tafaoga futipoolo mo te tausaga nei.
Te Pelesitene o te Fakapotopotoga tafaoga o Tuvalu TNSA ko Tapugao Falefou e fai mai ki tala o Tuvalu me i tena fono i te aso nei, te fakapotopotoga ko oti ne iku i a ia ke kamata te fepakiga muamua loa mo te Ipu a te Tupe teu a Tuvalu TNPF 2007.
A fepakiga ka kamata i te po 17 o Fepuali 2007.
A fakamauga o igoa o tiimu tafao mo te fepakiga tenei ka pono i te 11 o Fepuali kae 20 talaa te togi o te tiimu e tasi.
Te kalapu futipoolo ka fia ulu ki loto i te Fakapotopotoga TNSA e tau o togi ne te selau talaa.
I te fono foki tenei ne iku i ei ke fai te fono tela ka fili i ei taipola fou o te fakapotopotoga mo te tausaga nei.
E aofia i tofiga kola ka filifiligina ko te pelesitene, te sui pelesitene, te teu tupe mo te failautusi ei.
I muna a Tapugao me i kalapu katoa e manakogina ke aofia i te filiga o ofisa fou i te fono tenei.
Ko fakamasaua atu foki ki kalapu katoa ke togi olotou ulu ki loto i te fakapotopotoga, pela foki mo te togi o olotou tiimu kola e fia aofia i loto i fepakiga mo te Soccer League a te TNPF mo te tausaga nei.
Palele
