TANGO ne fanatu tena savali ki sui maluga o Taiwan
Ne tusi ne Silafaga Lalua
I tena fonotaga i te po 21 o Setema i tausaga ko fano, te komiti fakatonutonu o te Fakapotopotoga a fakapotopotoga se kau i te malo ko te TANGO, ne iku ke fanatu se savali ki te sui maluga o Taiwan i Funafuti nei.
I vaiaso ki mua o te masina nei ne fanatu loa te savali tenei, kae ne aofia i ei te pelesitene o te TANGO, tokolua mai tino e kau i te TANGO, te pule o te fakapotopotoga mo te tino galue tokotasi.
E lua mataupu mai mataupu e lima kola ne avaka ki tena malu, ko te fakatagi mo se tino fesoasoani i loto i te ofisa, mo te fakatagi mo se fesoasoani tupe mo avatu se Malaga tauloto a te fakapotopotoga.
Lipoti ne fai mai me i te tokouke o tino e kau ki te fakapotopotoga mo te fanaka ki luga i te lima tausaga ko teka, ko lasi kii te fakalavelave e fakafesagai mo TANGO i te se lava o ana tino galue.
E isi se tino e galue nei o fesoasoani ki luga i fakapotopotoga maise ki luga i atiakega mai polotieki foliki, kae tiga te tokouke o tino ko uke olotou mea ne tauloto mai akoakoga ne fakatoka mo latou, e tokouke foki loa niisi o latou kola koi manakogina ne latou te fesoasoani o te TANGO.
Ne fai mai te lipoti me i te tino tenei ka vau mai Taiwan, kae togigina ne Taiwan, ka lasi kii tena fesoasoani ki te atiakega o fakapotopotoga mo fenua i Tuvalu nei.
Te sua fakatagi ne avaka ki tena malu ko te fesoasoani i mea tau tupe mo te lago malo o Taiwan ki te aveega o se Malaga tauloto a te TANGO ki Taiwan.
Te Malaga tenei ka fesoasoani o faopoopo te poto mo te atamai mai tino mo fakapotopotoga se kau foki i te malo i Taiwan.
Mea nei ka fesoasoani foki ki te galue tasi mo te lei o fesokotakiga i te vaa o fakapotopotoga io me ko NGOs i Tuvalu nei mo Taiwan.
I tena tali ki fakatagi konei, a Daniel Liao ne fai atu ki te TANGO me ko avaka ne ia ki Taipei, te laumua o Taiwan, kae talitonu a ia me e mafai kii o fakataunu ne Taiwan.
Palele
