TAS ko sala sene mo tafaoga Pasefika 2007
Ne tusi ne Silafaga Lalua
Te Fakapotopotoga o Tafaoga o Tuvalu TAS ko noono nei ki tino katoa mo se fesoasoani i mea tau tupe mo ave te tiimu tafao a te atufenua ki tafaoga lasi a te Pasefika ko te Pacific Games tela ka fai i Samoa i te tausaga nei.
Nakibae Kitiseni mai te fakapotopotoga ne fai mai ki tala o Tuvalu me i te fakapotopotoga ka fai tena tuisi i te Aso Lima o te vaiaso nei po 12 o Ianuali, i te Lucky Set Club mo fesoasoani ki te tiimu.
Ne fai mai ne Nakibae me i te tuisi ka isi ne failoga ka tuku atu ki tino manuia, pela mo fagu malosi.
I ana pati me i fagu malosi ne fakamealofa mai ne ofisa maluga o te malo mo fesoasoani ki te taumafaiga a te fakapotopotoga.
Ne iloa atu ne tala o Tuvalu me i tupe konei ka maua i salasalagasene konei ka togi ki ei a pasee i vakalele, togiga mo niisi mea taua aka kola e manakogina ke kau atu fanau Tuvalu konei ki te tafaoga.
Ko kalaga fakaaloalo atu Nakibae mo te fakapotopotoga ki kalapu tafao katoa ke fakatasi mai ki te salasalagasene tenei, kae kea vatu foki ne olotou taugasoa ko te mea ke fesoasoani tasi katoa ki te salaaga o tupe mo ave te tiimu Tuvalu ki Samoa.
Palele
