Taukiei mo Enate ki te fono i Fiiti
Ne tusi ne Silafaga Lalua
E tokolua fanau Tuvalu kola ka fakatele ne laua te polokalame mo tupe fesoasoani foliki mai lalo o te Tupe fesoasoani a te lalolagi mo mea tau enivalomene GEF, ne olo atu ki te fono e tolu aso te leva tela e fai i Fiiti.
Enate Evi mo Taukiei Kitara tino e autuu ki ei fesokotaki e uiga mo te polokalame i Tuvalu e aofia nei i te fono tela e kamatai te aso nei po 30 o Ianuali ki te po 2 o Fepuali.
Te fono tenei a te GEF e taumafai ke fakamaina a tiute o tino konei i fenua takitasi, i te fakatelega o te polokalame, kae mafai foki pefea ne fakapotoptoga se kau i te malo o maua ne latou te fesoasoani tupe tenei.
Te polokalame tenei e fakatele loa ne fakapotopotoga se kau i te malo, kae fakasaga tonu loa mo fesoasoani tupe foliki ke fakaoga ne fakapotopotoga se kau i te malo i me ko fakapotopotoga a fenua.
Ko oti ne lavea ne te GEF me i te lasiga o polotieki kola e oko atu mo fakatagi ki tupe, ne polotieki lasi kii kae nofo a tupe ki te miliona, kae ko polotieki kola foliki kae mafai fua o fakataunu ne fakapotopotoga foliki, kae kola se lasi te tupe e fano ki ei, se tii uke.
Tenei la ko taketi ei te polokalame ke fakataunu ne ia manakoga tau tupe o polotieki foliki penei.
Ne fai mai ne Taukiei ki tala o Tuvalu me i te polokalame tupe tenei e mo polotieki foliki fua kae tau katoa ne polotieki mo mea tau enivalomene.
A tino konei e kau ki te fono ka noono foki ki luga i te pateti io me ko tupe mo fakatele te polokalame, mo polokalame katoa kola ka fai mo fakataunu te polokalame tenei.
Palele
