Telefoni ate Sataulo Kula Ne
Telefoni ate Sataulo Kula
Ne tusi ne Lina Malaki
Te Sataulo Kula o Niusila ne fesoasoani ki te Sataulo Kula o Tuvalu i te fakamauaga o telefoni e igoa ko satellite phones kolaa e manakogina malosi ke fakaogaa i taimi o mea tupu fakavave mo fakalavelave fafuasei.
A telefoni o Niulakita mo Nukulaelae ko oti ne avatu ite Malaga taluai.
Te ofisa e panaki mo galuega kite mafulifuliga o tau o aso mo fakalavelave tupu fafuasei Tataua Pese mote tokotasi tino galue i te Ulu ofisa ote Sataulo Kula Matakina Simii ne olo atu ite Manufolau o fakaoko a telefoni ki Nui, Nukufetau mo Vaitupu.
I te taumafaiga ke see lasi te tupe e fakamaumau ne te Sataulo Kula o Tuvalu, ko oti foki loa ne aumai ne te sataulo kula o Niusila a te aofaki ke taki lima sefulu talaa e fakaogaa i te masina mo telefoni konei, kae ka iloilo foki loa ne te sataulo kula o Niusila a te fakaogaga mo te pili o telefoni konaa.
Te Ulu ofisa ote staulo kula o Tuvalu ko oti foki ne fai ne ia se fakanofoga mo telefoni konei, telaa kafai ne fakaogaa ne fakapotopotoga sataulo kula o fenua a telefoni konei ki nisi mea ka panaki loa mo latou a pili konaa.
Ka isi ne akoakoga e fai i aso tolu fakaoti o masina katoa ko te mea ke avaka te iloa o tino galue i fakapotopotoga sataulo kula a fenua i te fakaoga o telefoni fou konei, i pati a Tataua ki tala o Tuvalu.
Te suaa malaga a Tataua mo Mataakina ka fanatu ki fenua ki matuu.
Palele
