TNPF ave sene ki tafaoga
Ne tusi ne Silafaga Lalua
Te Tupe Teu a Tuvalu ne avatu tena mealofa lasi mo fesoasoani ki te avega o te tiimu tafao a Tuvalu.
Penielu Teo, te menetia o te Tupe Teu, ne tuku atu ne ia te tieki e aofaki ki te lima afe talaa ki te ofisa o tafaoga ko Robert Laupula mo fesoasoani ki te tiimu tela ka sui atu ne ia te atufenua i tafaoga lasi a fenua o te Pasefika tela ka fai i Samoa.
Robert ne fai mai ki tala o Tuvalu me i te lima afe tenei ko faopoopo ki luga i te selau afe talaa mai te malo, kae tela ko isi i loto i te pateti a te minisituli o tafaoga mo te tausaga nei.
Ne fai mai ne ia me ko isi ne tusi ne fakaoko atu ki fakapotopotoga katoa i luga i Tuvalu mo se fesoasoani tau tupe mo fesoasoani.
Mea nei se auala e tasi ne mafaufau ei te fakapotopotoga tafaoga Tuvalu ko te TAS me ka maua mai ei ne tupe ma latou kola ka olo atu o tafao.
E iloa atu ne tala o Tuvalu me i te TAS e taketi ki se aofaki e tolu sefulu afe talaa ke lava ei ke avatu a tino tafao mo ofisa katoa ki te tafaoga.
I pati a Robert me i sose tino io me se fakapotopotoga e fiafia o fesoasoani ki te fakalavelave a te TAS tenei e talia fiafia.
I luga i malae tafao, a tamataene mo tamafine tafao ko oti ne kamata olotou fakaakoakoga i tafaoga kola ka sui atu ei ne latou Tuvalu i ei.
Palele
