Tupe mo talavou
Ne tusi ne Yvette D’Unienville
Te Tupe mo talavou telaa e fakateletelegina ne te Matagaluega mo talavou a te maloo ne lasi kii tena fesoasoani ki talavou o te atufenua i feituu tau akoakoga.
Kae i te vaitaimi nei, te matagaluega mo talavou koi fakatali loa nei kite tupe tenei ke oko mai, e ui ei koi isi loa ne muu tupe e toe mai tupe o tausaga ko teka.
Petueli Noa, telaa ko te ofisa mo talavou ne fai mai ne ia, me i te aofaki tupe tenei e masani o aumai ne te Ulu ofisa o fenua ote Pasefika SPC mo fesoasoani ki atiakega a talavou.
I tausaga ko teka a te aofaki e nofo kite 28 afe talaa, kae fakamuli ifo ne fanaifo ki te 16 afe.
E 100 pasene o te tupe tenei e fakaogaa ki luga i te atiakega o tulaga tau akoakoga o talavou.
Ko tokouke kii a talavou ne mafai o fai olotou akoakoga ite akoga maluga USP i Funafuti nei mai te fesoasoani o te tupe tenei.
Ne fakamaina aka ne Petueli me i te fesoasoani o te tupe tenei e togi fua ne ia te 50 pasene o te togi ote polokalame a te talavou kae kote suaa 50 pasene o te Polokalame e panaki loa mo te talavou, kafai e manuia ko toe togi atu ne te tupe tenei a te 50 pasene telaa ne togi ne te talavou.
Tenei e see aofia iei a togi o tusi akoga ote Polokalame.
E isi foki loa se komiti e onoono ki tusi fakatagi a talavou mo te fesoasoani tupe tenei.
Palele
