Minisita oloolo Malaga foki mai Amelika
Ne tusi ne Silafaga Lalua
Te Minisita o Oloolomalaga tena malu Taukelina Finekaso ko foki mai ki te atufenua mai tua o te fakatasi atuuga ki te fono e tolu aso te leva mo te kamupane ko te Veisign i Amelika.
Verisign, te kamupane tele ne togi ne ia, kae fakatele ne ia te igoa dot TV a Tuvalu, ne kami mai ne ia te minisita mo tena failautusi ke olo atu ki Amelika o onoono ki te fakateletelega o te kamupane.
Te fonotaga ne faipati ki luga i te feagaiga tenei ne saina ne Tuvalu mo te kamupane, te palani ke sala ne sene e uke atu ma te kamupane, te avanoaga galue mo fanau Tuvalu mai te matagaluega o komipiuta a te malo, mo te mafai o fakagalue se vaega polokalame tela e lavea katoa ei a galuega fai a te Verisign i Amelika ne tino i Tuvalu nei.
Taukelina ne fai mai ki tala o Tuvalu me i te 2007 ko te ono o tausaga ki loto i te 15 tausaga o te feagaiga tenei, tela ne saina i te 2000.
A Tuvalu ne maua ne ia 2.2 miliona talaa Amelika i tausaga e lima muamua, kae mai te 6 o tausaga ki mua ka fanaifo te tupe maua ki te 2 miliona talaa.
Mai lalo o te feagaiga foki tenei, ne iku i ei me kafai te tupe maua a te Verisign e siliga atu i te 5 miliona talaa Amelika, te 5 pasene o te siliggaaga tena e a Tuvalu.
Ona ne seki mafai loa o oko te tupe maua a te kamupane ki kona, ne seki maua loa ne Tuvalu tena 5 pasene tena.
I muna a te minisita me e fanoanoa me ko se mafai o toe tala te feagaiga ko te mea ke mafai o toe fakatagi ke avaka te tusaga o Tuvalu ke maluga atu i te 2 miliona talaa.
I te kamataga o te feagaiga, ne aumai ne te kamupane tenei te 25 miliona tupe Amelika, kae seki mafai loa ne te kamupane o toe fakamaua tupe kona, pela foki mo tupe katoa kola ne togi mai ki Tuvalu ke oko ki taimi nei.
Te kamupane koi sala loa nei ki auala kola e mafai o maua mai ei a tupe ma ia, kae ke penefiti foki ei a Tuvalu.
te Malaga ne togigina ne te kamupane tenei kae ko tena malu ne taunu mai ki Tuvalu i te aso anafi.
Palele
