Sefulu afe foliga o Tuvalu, polotieki a Tuvalu Overview
Ne tusi ne Silafaga Lalua
Te Fakapotopotoga se Aofia i te malo a Tiapaani ko Tuvalu Overview ko kalaga fakaaloalo ki te fesoasoani o tino Tuvalu katoa i te fakataunuga o te polotieki.
Te polotieki e aofia i ei ko te pei o ata o sose tino Tuvalu i sose fenua, kae o fakafesili ki luga i palani mo aso mai mua, kae kola ka fesoasoani ki te fakamainaga ki fenua lasi a te pokotia o Tuvalu i pokotiaga o te enivalomene ? i te tai fanaka, vela o te vanimonimo mo te mafulifuliga o tau o aso.
A Shuuichi Endou, te Pelesitene o Tuvalu Overview ne fai mai ki tala o Tuvalu me lasi kii te fesoasoani o foliga o tino Tuvalu katoa ki te fakalasiga o te leo o Tuvalu i mataupu kesekese kae maise i mea tau enivalomene.
Ne toe fakamatala mai ne ia me i a Iulai mo Aokuso i te sua tausaga ka isi se maopoopoga a fenua lasi loa e valu o te lalolagi i Tokyo, i Tiapaani, kae manako a ia ke isi se fakaasiga o ata konei mo fekau mai tino takitasi ke lavea ne tino maluga mai fenua konei.
I ana pati foki me i te polotieki tenei e togi ‘mafa kii loa ona la e manakogina ke oko ki tino taki tasi, tamaliki mo tino ma’tua i fenua katoa ? tela la e manakogina kii loa te fesoasoani o te malo mo tino taki tasi ke fakataunu a te polotieki tenei.
A tino taki tokotasi ka pei olotou ata, kae fakafesili foki ki luga i olotou fakamoemoega mo aso mai mua pela foki te molimau ki te pokotiaga o Tuvalu mo kaiga taki tasi i fakalavelave tau enivalomene.
Kafai ko oti te polotieki ka faite mai ei ne tusi ata o tino katoa kae ka tuku fakamealofa atu ki fenua taki tasi.
A Shuuichi e manako o fakamasaua taimi mua i Tuvalu kola ne galue fakatasi ei tino katoa o atiake te atufenua mo fenua takitasi, kae seki fakanaa ki fesoasoani tupe mo mea aka. I tena fakamoemoega me ka tasi penei a loto o te 10 afe tino Tuvalu i te fakataunuga o te polotieki tenei.
Te polotieki e fakatautau ke kamata i te masina o Apelila i te tausaga nei ko te mea ke oti lei koi tuai o oko ki te maopoopoga a fenua lasi i Tiapaani, kae koi tuai foki o oko ki te 30 tausaga o te tutokotasi o Tuvalu i te po muamua o Oketopa i te tausaga 2008.
Palele
