Tamaliki akoga olo ite vakalele
Ne tusi ne Semi Malaki
E tusa mo te tokovalu tamaliki akoga kola ne maua olotou avanoaga o olo o akoga i tua atu kae togigina ne te Maloo o Tuvalu, ne faimalaga i te vakalele ote Asofaa ite vaiaso nei.
A latou konei ne faimalaga e isi ne tamaliki ko fakasoko ki te lua tausaga o olotou polokalame kae ko nisi ko tausaga muamua o latou.
E tokolima mai ia latou ka fakasoko olotou akoakoga i te akoga maluga ote Vasa Pasefika USP i Fiji.
E aofia ia latou konei, ko Vaegano Puapua mo Amalinda Satupa kola ka fakasoko la akoakoga mo laa pepa maluga ko te BA in Education. Ko Moe Saitala ka fakasoko i tena polokalame ko te BA in Economics, mo Triny Uluao iei tela e foki ne ia te pepa maluga ko te BA in Industrial Relations. Kae ko Efren Jogia tela ka fanatu ki te akoga fakaloia i Vanuatu o akoga fakaloia mo tena tausaga muamua.
Ne fai mai ne te Ofisa tokotasi ite Minisituli o Akoakoga me e tokotolu foki tamaliki ka olo o akoga ite akoga maluga o Fiiti ko te FIT.
E aofia ia latou konei ko Panama Niuatui tela ka fakasoko mo tena pepa ko te Diploma in Architectural Drafting, ko Afega Leti mo tena pepa ko te Diploma in Mechanical Engineering mo Talavalu iei tela se tamaliki fou ka kamata tena akoakoga mo te pepa maluga ko te Diploma in Architectural Drafting ite tausaga nei.
Ne fai mai foki ne ia me e tokolua tamaliki kola e togigina ne Ausitalia mo Niusila ne olo atu foki ite vakalele tenei.
Laua konei ko Mataituhi Toafa tela ka fakasoko ana akoga i Niusila mo te pepa maluga ko te BA in Sports mo Kelisiano Niuatui tela ka akoga mo te pepa maluga ko te BA in Civil Engineering.
Ne faopoopo mai me koi isi foki ne tamaliki konei koi faitalitali ki ke olo atu o akoga ite vaiaso fou.
Palele
