Te akoakoga mo te enivalomene
Ne tusi ne Silafaga Lalua
Te tagata fesoasoani kae fai fautuaga ki te malo o Tuvalu i feitu tau te enivalomene ko Ian Fry e nofo nei i te atufenua, o fai se akoakoga ma tino Tuvalu mai matagaluega i loto i te malo pela foki mo fakapotopotoga se kau i te malo.
Te akoakoga e fai i loto i aso e tolu kae fakasaga tonu ki luga i te faakoakoga o tino konei ke iloa ne latou o fai a faipatiga mo fesokotakiga mo tino mai niisi malo ki luga i mea tau enevalomene.
I pati a Ian ki tala o Tuvalu me i te kanoloto o te akoakoga ko te mea ke iloa ne ofisa o fesokotaki kae faipati mo tino mai fenua mo malo fakatea, ki luga i mataupu tau enevalomene.
Te akoakoga e togigina ne te Uniuni a Eulopa e auala mai i te WWF io me ko te Tupe fesoasoani a te lalolagi katoa mo mea tau natula ? kae ko te lua o taimi tenei ke fai te vaega akoakoga tenei i Tuvalu.
Te ofisa mo mafulifuliga o tau o aso ko Pepetua Latasi ne fai mai ki tala o Tuvalu me i te akoakoga ka pono i te afiafi o te Aso Lima, i te faletalimalo ko te Vaiaku Lagi.
Ne iloa atu ne tala o Tuvalu me i a Ian Fry ne fai foki ne ia ne akoakoga penei i niisi fenua o te Pasefika.
A ia ka nofo aka i Funafuti nei mo se vaiaso e tasi mai tua o te akoakoga tenei, ako tena vau ki Tuvalu e togigina katoa ne te WWF.
Palele
