Te kamupane ko te CATIC ko manako ke faopoopo a sui o te AIL i te komiti Ea Fiiti
Ne tusi ne Silafaga Lalua
Te kamupane Saina ko te CATIC tela e aafa tena tusaga i te kamupane olo Malaga i te ea ko te Aviation Investment Limited AIL, ko oti ne fakatagi atu ki te Ea Fiiti ke toe onoono ki te aofaki o sui i tena komiti.
A Tuvalu e o ia te sua aafa o tusaga ki te AIL, kae ona ko te AIL e lasi atu tena tusaga i loto i te Alaavakalele ko te Ea Fiiti, e tokouke atu foki ana sui i te komiti fakatonutonu o te Ea Fiiti.
Tapugao Falefou te sui failautusi o te minisituli oloolo Malaga ne kau atu i te fonotaga a te komiti tenei i te vaiaso ko teka, kae ne fai mai me i te CATIC nefakatagi ko te mea ke toe faopoopo a sui o te AIL ki loto i te kmiti fakatonutonu o te Ea Fiiti.
I ana pati me i lalo o te fakavae o te Ea Fiiti e mafai o tokovalu sui o te komiti, tela i te vaitaimi nei e tokofaa mai te AIL tela e kau ei Tuvalu, tokotasi mai Fiiti, kae tokolua sui mai tino mo fakapotopotoga se lasi olotou tusaga i loto i te kamupane vakalele tenei.
I muna Tapugao me ka avaka ne ia te mataupu tenei ke onoono ki ei te Kapineta i se taimi pili mai mua nei.
A Tuvalu e suigina ki loto i te komiti tenei ne te failautusi o te minisita oloolo Malaga, mo te sui maluga ei o Tuvalu ki Fiiti.
A te AIL i te vaitaimi nei ko ia loa e lasi tena tusaga i loto i te Ea Fiiti ki se aofaki e 86%.
Palele
