Tekega ki luga i aveavega o sene i feitu se tonu
Ne tusi ne Silafaga Lalua
Te pangike o Tuvalu ko isi nei sena gasuega ki te fakaseaiga o aveavega o tupe i auala se tonu.
Te mea nei ne fai i te akoakoga e tolu itula te leva i te vaiaso ko teka, tela ne aofia i ei a sui mai matagaluega kola e tau olotou galuega ki te mataupu.
I pati a te menetia o te pangike o Tuvalu Siose PTeo, me i te akoakoga ne fakamafua ko te mea ke mafai o maua se avanoaga ne tino e aofia olotou galuega i te aveavge o tupe, ke iloa ne latou olotou tiute fai i te taumafaiga ke seai ne tupe masei e too mai ki loto i te atufenua.
Te loia e tokotasi mai te ofisa loia o te malo ko Saaga Teafaa ne fai tena folaga ki luga i tino i te akoakoga, ki luga i te uiga tonu o te aveavega o tupe i auala se tonu, pela foki mo te fakamatalaga a te tulafono ki auala kola e taia ei te tino mafai ko kau i mea penei.
Se gata ikona ne fakamatala ak foki ne ia auala kola e mafai ei o fakagata auala penei.
Ne fai mai foki ne Siose me ko isi ne vaega mea penei ne tupu i Tuvalu nei i tieki kola e aumai mo tino mai tua ke fuli ki tupe i te pangike o Tuvalu, mo tupe pepa foki kola ne tupe faite fua kae ke fakaoga i loto i te atufenua.
Ne iku aka i te vaa o te pangike o Tuvalu mo pulisimani, pela foki mo niisi matagaluega, ke galue fakatasi latou i te fakagataaga o tupe penei ke aumai ki loto i te atufenua.
Palele
