Tufuga ke tuku tino pakia ke olo ki tokita
Ne tusi ne Silafaga Lalua
Tino pa’kia i Tuvalu ko fakamalosigina ke olo muamua ki te fakaimasaki koi tuai o olo ki tufuga.
I Tuvalu nei kafai a tino a pa’kia ? me fati me makui kogakoga o olotou foitino, e olo muamua loa ki tufuga faka Tuvalu ko fatoo olo ei ki tokita manafai ko see lei.
Silafaga Lalua ne faipati ki tokita kae ne fai ne ia te lipoti tenei.
Te tokita tipitipi i te fakaimasaki lasi o Tuvalu ko tokita Innocencio Oballo ne fai mai ki tala o Tuvalu me i te ukega o ma’saki kola e olo fakamuli atu ki te fakaimasaki, ko uke kii fakamaseiga ki olotou pa’kiaga tela ko faigata i ei te fakatonuuga.
I ana muna i tokita ko fia katoa tausaga ne akoga i ei latou ki te faiga ke lei a sose masaki e aofia i ei ko pa’kiaga o ivi o te foitino.
E fakamolemole mai tokita ki tufuga katoa aga lei kae fia fesoasoani, ke tuku atu a tino pa’kia ke olo atu mua katoa ki te fakaimasaki ke fakagata ei a fakamaseiga mo faigataaga kola ne mea ne mafai o se tupu.
Te tufuga e tokotasi ko Elina Temaolo ne fai mai ki tala o Tuvalu me i a ia ko siliga nei mo te 40 tausaga ne fesoasoani ei a ia ki tino masaki penei, pela foki loa mo niisi ma’saki.
Ne fakamatala mai ne ia me se tii fakafoki ne ia sose tino e manako ki se fesoasoani, kae uga faeloa ne ia na masaki ke olo ki te fakaimasaki ke fakaata olotou pakiaga manafai ko oti ne fai ne ia.
Ne fakaasi mai ne Elina me e maina ia i tokita fakaimasaki mo tufuga e isi katoa ne mea see a latou i te fakaleiga o masaki tela la manakogina malosi ke galue fakatasi laua konei ki te fakataunuga o te pogai o laa galuega ko te fesoasoani ki tino masaki.
Se gata i kona ne fai mai a Elina me i tufuga kola e fakatau atu e see mafai o fakalei ne ia te pakiaga o te tino e sili ke tuku ke fano mua ki te fakaimasaki koi tuai o patele ia ki ei.
Palele
