Tupe fesoasoani o Tiapaani
Ne tusi ne Silafaga Lalua
Te tino fesoasoani mai te tupe fesoasoani a Tiapaani ki Tuvalu e nofo nei i te atufenua mo se 2 masina o fesoasoani ki te fakaogaaga fakalei o avanoaga ki te tupe fesoasoani mai Tiapaani, ne te malo o Tuvalu.
Masayashi Ono ne taunu mai i te lua vaiaso ko teka, mai tua o te fakatagi a te malo o Tuvalu ki te malo o Tiapaani ke vau se tino o fesoasoani ki te fakamainaga o te faiga o fesoasoani o te tupe fesoasoani a latou.
Ne fai mai ne Masayashi me i tena nofo i konei mo te lua masina, ka fesoasoani a ia ki te fakamatalaga ki te malo, i matagaluega kesekese te fakaogaaga o te tupe tenei, mo te fakasologa o te faiga o akai, ke oko loa ki te fakaotiga.
I te vaiaso muamua o ia i konei, a Masayashi ne fanatu o feiloai mo ofisa matuatua o ministuli mo matagaluega kesekese o te malo o faipati ki te pogai ne vau ei a ia, kae fakamoemoe a ia me ko tai lasi atu te iloa o latou i te fesoasoani tenei.
A Masayashi e fakamoemoe i tena lua masina i konei ka lasi te fesoasoani o ia ki te malo o Tuvalu i te sokotakiga mo te malo o Tiapaani, kae o matea a vaega polotieki mo polokalame kola ka lasi te fesoasoani o latou ki te malo.
Te sui maluga o Tiapaani ki Tuvalu ko Masashi Namekawa ne fai mai ki tala o Tuvalu me i te malo o Tuvalu ko leva ne manako ki se tino poto i mea tau fesoasoani penei, kae i taimi nei ko manuia kii i te vau te fanau Tiapaani tenei tela e lasi tena iloa i te mataupu tenei.
Te fale masini fou a Tuvalu tenei ne tala i te aso anafi ne faite mai te tupe fesoasoani a Tiapaani, pela foki mo te polotieki fou tenei ka kamata ki te fakafouga o te uafu sai vaka i Funafuti nei.
A Masayashi ne fai mai foki me i tafa loa o te fesoasoani tenei, e isi foki se fesoasoani o Tiapaani i polotieki tai foliki tela e matala foki ki Tuvalu.
Palele
