Akoakoga Saolotoga mote Selamete
Ne tusi ne Semi Malaki
A fakapotopotoga se aofia I te malo mo tino i Tuvalu nei ka mafai o avaka te lotou malamalama i tulaga o saolotoga o tino maise mo te masaki tenei ko te selamete, mafai ko oti te akoakoga e faa aso te leva, tenei e fai I te vaiaso nei.
Te akoakoga tenei ne fakatokagina ne te Kaunisela Fafine Tuvalu-TNCW mo te fesoasoani ote RRRT-tela se tiimu e galue ki tulaga tau te saolotoga o tino ite Pasefika nei.
Ne fai mai ne te Ofisa e galue mo saolotoga o tino-Saini Malalau Seluka ki Tala Tuvalu, me ite akoakoga tenei ka fakaakoako iei a sui mai fakapotopotoga kesekese i luga i Funafuti nei ki fakalavelave ote masaki ko te selamete mo saolotoga o tino.
A sui ite akoakoga tenei ka onoono kae titii manatu ki luga ite mataupu ko te saolotoga o tino.
Latou foki ka kilo fakalei ki tulaga o tulafono kola e fakalauefa ne latou a fakamaseiga ki tino kola e pokotia ne te selamete, kae ke fai fautuaga ki auala kola e mafai iei o fuli a tulafono konei, ko te mea ke fakamalosi kae fakatuu se feitu lei tela e fakamama iei te pisi ote manu ote selamete kae e puipuigina foki ne te tulafono.
I loto ite faa o aso tenei, ka onoono latou ki tulafono i loto ite fakavae o Tuvalu kola e autu tonu ki te puipuiga o te masaki tenei ma pisi malosi.
A Saini e talitonu me ka oti te akoakoga tenei, ka mafai iei ne tino taki tokotasi mo fakapotopotoga se aofia ite malo o iloa olotou saolotoga kae taumafai o faite se enivaolemene lei mo tino kola e pokotia ne te selamete.
Te akoakoga tenei e fakaoti ite Asolima ite vaiaso nei kae takitakigina ne te tiimu fai akoakoga mo te saolotoga o tino i fenua ote Pasefika.
Palele
