Fakaso te ola o te fonu - ko te akoakoga
Ne tusi ne Silafaga Lalua
Te akoakoga fakailoa ki luga i fonu ne pono ki te fakamailogaaga o fonu e faa kae tuku ke tele i loto i te namo o Funafuti i te aso anafi.
Te akoakoga tela ne kamata i te Aso Lua o te vaiaso nei, ne oti i te tutonu o te aso anafi i te Lotokava falekaupule.
Tino ne aofia i te akoakga ne fai aka olotou mau i te akoakga e lasi kii tena taaua mo tena fakailoaaga ki a latou e uiga mo te olaga o te fonu mo te iloa atu me olo loa o seai ne fonu i te tai.
Ne aofia i te akoakoga ko te fakamatalaaga ki a latou te olaga o te fonu, e fia foki vaega fonu e iloa atu me nofo i tai, mo te aofaki o fonu kola ko oti ne fakapatonu.
Falefaea Tapumanaia, se toeaina o Funafuti, kae ne kau foki i te akoakoga, ne fai mai ki tala o Tuvalu me e taaua ki loa te akoakoga me ko fatoo iloa lei atu ei te tala ki luga I fonu, kae ko te fakamoemoega maluga ke oko atu ki fenua i tua ke tasi tatou i te mainaga tenei ko nofo mo tatou.
I ana pati foki me i te taaua tenei e faigofie o fakapatonugina mafai e kau fakatasi tatou mo te malo, ke fai ne tulafono mo puipui ei a fonu mo niisi mea ola i te tai, kola e maua mai ei te maumea o te atufenua.
Te sui minisita o maumea totino ko tena malu Sir.Toomu Sione, ne pono ne ia te akoakoga koi tuai o tuku atu ne ia pepa o tino toko takitasi o te akoakoga.
Ne tuku atu foki ki a ia te fakaaloaloga ke fakapine ne ia te fonu muamua mai fonu e faa kola ne tuku ke sao i loto i te namo o Funafuti i te tutonu anafi.
A tino kau i te akoakoga, fakatasi mo latou ne paanaki mo te fakaakoakoga o latou, e fakamolemole atu ki tino katoa ke se puke ne latou a fonu konei ne fakasao I te Aso Lima ko teka, aua taumafaiga mo te polokalame ki te fakasoga o te ika ko te fonu.
Palele
