Fakataufaiga volipoolo muamua
Ne tusi ne Silafaga Lalua
Te fakataufaiga muamua i te tafaoga ko te volipoolo ne fai i te po i te koga tafao ko te Kausakiga.
A tiimu katoa ne fakalaina i loto i te koga tafao, kae ne talagina te faigamea ne tena malu Kausea Natano, tela ko te pelesitene o te fakapotopotoga tafaoga o Tuvalu TAS, ki tena lauga fakapitoa.
I tena lauga, ne fakamalosi aka ne ia tamaliki tafao ke taumafai ki te mea e mafai ne latou i te tafaoga ko te mea ke mafai o maua se pine mo Tuvalu i te tafaoga tenei e fakatokatoka o olo ki ei.
Se gata fua i te tafaoga ko te volipoolo ako Kausea e fakalausa tena faipatiga ki tiimu tafao katoa mo sose tafaoga, ke fakatuu tapula ke maluga i te tafaoga, ko te mea, kafai se maua se pine mo te tafaoga, kae ke maluga kii te taumafaiga i te faiga tafaoga lasi a fenua o te Pasefika i te tausaga nei.
Ne fakamasaua atu foki ne ia ko tamaliki tafao ke se sona olo fua i te tafaoga, kae ke olo mo te manatu maluga ke tai fanaka ki luga tulaga tafao mo tafaoga a latou, e pela mo te mea ne tupu i te malaga tafao ki Fiiti i te faa tausaga ko teka.
Tafaoga ne kamata i te itula e iva i te po kae ne oti ako leva kii te po. Ikuga o tafaoga i te po ka mafai o lagonamai ne koe i te aso ma taeao.
Palele
