Sukega ko toe iloilogina
Ne tusi ne Silafaga Lalua
Te sui o te fakapotopotoga mo tofotofoga o akoakoga a te Vasa Pasefika ki Saute SPBEA e nofo nei i loto i te atufenua o fai te sukesukega ki luga i te sukega mo vasega ono mlauga i Motufoua.
Te tokita ko U'hila Moe Lagi Fasi - te ofisa fakamatuatua mai te SPBEA, ne olo fakatasi atu mo te ofisa mo sukega i loto i te matagaluega akoakoga ko Michael Noa ki Vaitupu o fai te galuega tenei, fakatasi mo niisi galuega aka i te akoga ko Motufoua.
Te pule o akoga ko Katalina Taloka ne fai mai ki tala o Tuvalu me i te sukesukega o te sukega tenei e aofia i ei te kilo ki luga i polokalame mo te sukega tenei, toe kilo foki ki te mafai o faiakoga konei e fakaakoako ne latou a tamaliki vasega ono me tauga tonu olotou pepa mo te galuega, maise i te feitu ki internal assessments io me ko mea akoga i loto i te vaituaga kola e puke ei a kai o tamaliki akoga.
Te fakamoemoega e manakogina ma oti te sukesukega tenei, ko faiakoga ke mafai ne latou o tautali ki te polokalame mo te sukega, kae maise ke mafai ne latou o fakataunu a manakoga mo mea akoga i loto i vaituaga.
I tafa o te sukega tena, a Dr. Fasi mo Michael ka onoono foki ki te mafai o fakatoka te pepa sukega o te gana palagi i loto loa i te atufenua, kae ke fakaakoako foki faiakoga maise pule o mataupu taki tasi, ke mafai ne latou o fai pela me ne tino e fakamautinoa ne latou a pepa sukega.
Ke oko mai ki taimi nei, a pepa sukega gana palagi e fakatoka loa i Kilipati, kae ko fulifuli ei ne faiakoga ke taugatonu mo Tuvalu.
Ona la ko te pogai tenei, ko ala ei o isi ne fakamoemoega ke mafai loa o fakatoka i konei te pepa sukega tenei,ke fakaoga a faiakoga mo te atamai o faiakoga o te atufenua - ke kamata i te tausaga nei, kae ke kilokilo te matagaluega o akoga ki tena faitega.
E iloa atu ne tala o Tuvalu me pepa sukega konei ne fakamautinoa gina loa ne te SPBEA i Fiiti i tausaga ko teka.
A Dr. Fasi mo Michael e fokimai ki Funafuti i te sua malaga a te vaka mai Vaitupu.
Palele
