TAS i tena auala ki te IOC
Ne tusi ne Silafaga Lalua
Ko toe fia fua nei vaiaso ko kau atu ei te fakapotopotoga tafaoga a Tuvalu ko te TAS ki te Komiti o te Olympic a te lalolagi ko te IOC.
Te fakatagi a te TAS ke kau atu a ia ne fola I te fonotaga taluai a te komiti o tafaoga a te Olympic I fenua o te Pasefika ko te ONOC, kae ne fakatalia ne latou.
Te fonotaga tenei e fai mai te po 30 ki te 31 o te masina ko teka I Melbourne I Ausitalia.
Lipoti ne maua mai te ofisa o te TAS e fai mai me I te sua mea ka fai nei ko te avatu o te fakatagi tenei ki te fonotaga a te komiti o te IOC tela ka fai I Guatemala I te po 4 Iulai I te tausaga nei.
Te Failautusi saukatoa o te ONOC ko Dr. Robin Mitchell ka avatu ne ia te fakatagi a te TAS I te fonotaga tenei I Guatemala, kae ne tau o taunu mai ki te atufenua I te aso nei mo ne naai aso.
Te pogai o tena Malaga ko te asiasi mai ki polokalame tafao a te fakapotopotoga kae maise I ei ke lavea ne ia me pefea te lasi o te fia tafao o tino Tuvalu.
Ko oti ne fakaseai sena malaga ona ko te galo atu o te failautsi muamua o te fakapotopotoga tafaoga o Fiiti ko te FASANOC, tela ne galo i tefakaotiga o te vaiaso ko teka. Ka mafai o fakataunu tena malaga ki Tuvalu i te lua vaiaso mai mua nei.
Tena vau konei ka fesoasoani ki te avakaga ne ia te fakatagi a te TAS ke kau atu ki te IOC.
Lipoti ne maua mai me kafai e talia te fakatagi tenei ko kau atu ei TAS ki te IOC, kae maise ka mafai o kau I tafaoga lasi a te Olympic tela ka fai I Beijing, Saina 2008.
Te pelesitene o te TAS tena malu Kausea Natano ne fai ana pati me ia ia e fakamatamata kii me ko se ‘mao ko kau atu te TAS ki te IOC.
I ana muna me ka lasi te fesoasoani o te kau atu ki te IOC I feitu e uke.
Palele
