Air Pacific ko fakaotioti ana sokotakiga mo te malo o Tuvalu
Ne tusine Silafaga Lalua
Te alaa vakalele ko te Air Pacific ne fai mai tena malaga tofotofo i te Aso Ono ko teka o fai ana sukesukega fakaotioti mo ana faipatiga mo te malo o Tuvalu.
Te sokotakiga tenei e fakatautau ke fakatalia ei tena vakalele e tasi ke kamata mai ana malaga ki Tuvalunei, mafai e talia ne te malo.
Te failautusi o te minisituli o Fesokotakiga mo Oloolomalaga ko Tapugao Falefou ne fai mai ki tala o Tuvalu me e tino lua mo tokotolu ofisa galue mai te Air Pacific, fakatasi mo naai tino pulepule o mea tau oloolo malaga i te ea o Fiiti, ne aumai i te malaga tena.
A latou konei ne aumai mai o faipati mo tino mai vaega kesekese o te oloolo malaga i te ea, e aofia i ei ko tino taa afi, kamupane oela pela foki te matagaluega o tualisi.
I pati a Tapugao me i te kamataga loa o sokotakiga konei ia Novema 2006, ne fai ko te Pacific Sun, tela se alaa vakalele a te Air Pacific ke fakagalue ne ia te vasia tenei o Tuvalu mo Fiiti, kae i te kamataga o tausaga nei ko manako loa te Air Pacific ke vau loa ia o fakagalue ona la ko te Pacific Sun e fakagalue ne ia alaavakalele i loto loa i fenua o Fiiti.
Ne fesiligina Tapugao ki lua i mea lei kola ka mafai o maua ne Tuvalu i te vau o te Air Pacific kae ne fai mai me aofia i ei ko te mafai o fanaifo te togi o pasese, te aofia Tuvalu i loto i te distribution system, tela ka mafai ei o tokouke a tino mai tua e mai ki Tuvalu, mo te tupe ei tela ka mafai o ‘tae mai i luga i tiketi kola e togi i loto i te ofisa oloolo malaga o Tuvalu.
I ana muna foki me kafai e isi se fakalavelave e tupu kae manako te Air Pacific ke fakatagata tena alaaga vakalele tenei, ko oti loa ne toki ki lalo i te feagaiga tela ka fakagalue me tau mo latou o fakailoa mai i te ono masina koi tuai o fakagata tena fakagaluemaiga.
Te ono masina ka fakaavanoa ko te mea ke mafai ne Tuvalu o toe sala se sua alaa vakalele ke fai ne ia te galuega.
I te vaitaimi tenei te malo o Tuvalu ko fakatali nei ki te lipoti a te Air Pacific ke oko mai i se lua ki se tolu vaiaso.
Kafai e talia ne te malo te fakatagi tenei, e fakagalue te alaa vakalele tenei, mai tua o te 4 ki te 6 vaiaso.
Palele
