Fonotaga a taugasoa fesoasoani mo Tuvalu ki luga i te Kakeega Lua
Ne tusi ne Silafaga Lalua
Te lua o fonotaga a taugasoa fesoasoani o te atufenua mai fenua i tua mo fakapotopotoga ki luga i te Kakeega Lua, ne talagina ne te Ulu o te Malo Apisai Ielemia.
Te faa o tapula lasi kola ne kilokilo ki ei te fonotaga ko te toe fakamalosi, fakatumau mo te fakataunuga o te Kakeega Lua; ke lei te galue fakatasi o atiakega a tino taki tokotasi pela foki mo te atufenua, kola e togigina i loto i te atufenua io me togigina ne taugasoa fesoasoani.
Te toe fakamalosi atu a te vaa fakataugasoa o Tuvalu mo taugasoa fesoasoani, mo tte toe tapulaa i ei tela ke olo tasi a tupe fesoasoani mai taugasoa fesoasoani mo Te Kakeega II mo te Kakeega Matrix.
Te fonotaga e tasi te aso ne aofia i ei a sui mai taugasoa fesoasoani i tua atu o Tuvalu, tela ne fai aka ne tena malu te Ulu o te Malo i tena lauga me ne lasi kii te fesoasoani o taugasoa konei i te faitega o te Kakeega II.
I ana pati me ona ko te loto fakatau fesoasoani tenei ko ala ei o toe fakatoka ne Tuvalu te lua o fonotaga penei i te tausaga nei.
Te fonotaga muamua penei ne fai i te masina o Mee i te tausaga ko teka, tela ne mafua mai ei te tusi ko te Kakeega Matrix tela ka kilo mo tausaga 2006 ki te 2008.
I loto i te matrix ne fakamuamua i ei a mataupu kola e lasi te manakogina kae maise e lasi te manakoga ki fesoasoani mai tua atu.
Te Ulu o te Malo e talitonu me taaua ke toe ‘kilo aka ki mafaufauga o tino Tuvalu kola ne fakamau ki lalo i te Kakeega II, ko te mea ke isi se malamalama i te taaua o te iloilo o te fanofanoga o te Kakeega Lua mo te fakataunuga o ia i tausaga taki tasi.
I konei e fakamasaua kae fakamalosi foki ei te kiloga taaua mo aso mai mua o te Kakeega tela e fakamuna pela me “i te tausaga 2015, ko maua ne Tuvalu te ola tokaga malie i te ola lei, lei tulaga o akoakoga, filemu mo te maumea o te atufenua, takitakigina ne tulaga talitonu ki te Atua, tela e fakaasi mai luga i te muna tuku - Tuvalu mo te Atua”.
Palele
