Te fale fakasalalau ka foki ki te malo
Ne tusi ne Silafaga Lalua
A te kamupane fakasalalau mo te tusitala ko nofo nei i ana aso fakaotioti pela me se kamupane koi tuai o toe fakafoki atu a ia e pela me se matagaluega a te malo.
Te toe fakafokiiga tenei koi fai nei tena malaga ki loto i te fale o Palamene i te Tulafono Fakatautau ke fakaseai te Kamupane Fakasalalau 2007 tela ka fai manatu ki ei sui malu i te fonotaga a Palamene tela ka fai i te masina nei.
Te pogai o te tulafono fakatautau tenei ko te mea ke fakaseai te tulafono tela ne fakatalia kae fakatuu ne ia te Kamupane Fakasalalau o Tuvalu (Tuvalu Media Corporation Act 1999), ke mafai ei o fakaseai se Kamupane Fakasalalau a Tuvalu.
Te Kamupane Fakasalalau tenei ka fakaseai mafai ko liu tulafono te tulafono fakatautau tenei.
I te fakaotiga o te tausaga 2004, a Kamupane katoa ne fai te toe iloiloga ki ei, kae ne fautua mai ei ke fakaseai te Kamupane Fakasalalau ona ko te see mafai ne te Kamupane Fakasalalau o Tuvalu o fakateletele loa a ia i mea tau tupe talu mai tausaga ne fakatuu i ei.
Te tupe fesoasoani a te malo e tusa mo te 80, 000 tupe Ausitalia e aumai faeloa i tausaga katoa mo fesoasoani ki te fakatelega o te Kamupane.
Te tupe tenei ne kamata mai i te 2005. Te fesoasoani ne kamata mai te 300,000 talaa kamata mai te tausaga tela ne faka-Kamupane i ei tela ko te 2000.
Te Tulafono Fakatautau tenei se tasi o te ono tulafono fakatautau kola ka avaka i te fonotaga a te Palamene tenei ka kamata i te lua vaiaso mai mua nei.
Niisi Tulafono Fakatautau e aofia i ei ko te tulafono ke fakatalia te fakaogaaga o tupe a te atufenua ke mafai o fakaogaa mo te tausaga fakatupe tela e fakaoti i te po 31 o Tesema 2007, Tulafono Fakatautau mo fakamafulifuliga ki te tulafono o te Tupe Teu o Tuvalu, Te tulafono fakatautau ke fakatalia sose tino Tuvalu ke mafai foki a ia mo fai se tino o fenua fakaatea, te tulafono mo te sukega o akauni a te malo, Kamupane a te Malo, Falekaupule mo niisi mea aka, mo te tulafono fakatautau i ei mo fakalavelave lasi fakamasei mea.
Te fonotaga ka kamata i te sefulu i te taeao o te Aso Tolu po 25 o Iulai, 2007.
Palele
