Tiimu futipoolo ko fakatoka o fano
Ne tusi ne Silafaga Lalua
Te 40 tausaga o te olaga o te alaa vakalele ko te Air Fiji ko fakaavanoa ne ia ko te tiimu futipoolo a Tuvalu ki te faiga tafaoga i Samoa, ke fanatu o tafao mo tiimu i te fenua ko Fiiti kamata i te vaiaso nei.
Te pelesitene o te fakapotopotoga futipoolo ko Tapugao Falefou ne fai mai ki tala o Tuvalu me ne fakamealofa mai ne te Air Fiji e tolu sefulu tiketi faimalaga i vakalele, fakatasi mo seti togiga tafao e lua mo te tiimu, mo fai te fakamanatuga o te 40 tausaga talu mai tena fakatuuga.
Te alaavakalele e isi foki sena mealofa penei mo te tiimu lakapii a te atufenua.
I te lipoti ne maua mai, a tamataene o te futipoolo e ‘moe katoa nei i te Lotokava Falekaupule kae fai olotou fakaakoakoga mai lalo o olotou faiakoga. Ne kamata te olotou camp i te po muamua o Iulai.
Te 30 tiketi konei e olo i ei a tino fakatonutonu o te tiimu e tokolima mo tino tafao e tino mo te tokolima, kae ne iloa atu ne tala o Tuvalu me tokovalu o latou ne tiaki ne latou Tuvalu i te aso nei ako te toega ka olo atu ki Fiiti i te Aso Gafua o te vaiaso ma vau po 16 o Iulai.
I te po 17 ka tafao ei latou mo te tiimu a Rewa i te koga tafao ko te Cakobau Park. I te Aso Faa ka tafao te tiimu mo te tiimu a Suva i te National Stadium, kae ko te toe tafaoga a latou ka fai i te feitu ki togalaa o Viti Levu mo te tiimu a Lautoka, i te Aso Ono po 21 o Iulai.
Tapugao ne fai mai foki me ne isi se fakatokaga ne fai ke tafao te tiimu mo te tiimu futipoolo a Fiiti saukatoa kae seki mafai on ate avaa tiimu konei ka tafao fakatasi i te fakasologa o tafaoga o te faiga tafaoga i Samoa, kae ka fepaki foki loa muamua.
Ne fakafesili foki te pelesitene me kaia ne tuai kii loa te tour tenei kae ne fai mai me ne tau o fano i te masina o Tesema i tausaga ko fano kae fepaki loa mo te fakalavelave i te fenua ko Fiiti tena ne taofi ei.
Te tiimu ka nofo i te hotel ko te Peninsula i te vaiaso e tasi tela ka nofo ei latou i Fiiti.
Palele
