Tuvalu ko kau ki te IOC
Ne tusi ne Silafaga Lalua
Te kaiga o te Olympic ko gasolo loa o lasi mai te faopoopoga o Tuvalu fakatasi mo te fenua ko Montenegro i te Aso Lima ko fano.
Ne lasi kii te fakatali o tino Tuvalu, maise te fakapotopotoga tafaoga ki te ikuga tenei i te vaiaso ko teka, kae koi fai a te fonotaga a te Komiti Maluga o te Olympic i Guatemala.
Ko oti ne fakapatonu mai i te fakaotiga o te vaiaso ko teka me ko talia nei Tuvalu pela me se komiti a te Olympic i te Aso Lima po 6 o Iulai 2007, tela e aumai ne ia te aofaki o Komiti penei ki te 205.
Te failautusi o te Fakapotopotoga Tafaoga mo te komiti o te Olympic o Tuvalu ko te TASNOC, ko Nakibae Kitiseni ne fai mai ki tala o Tuvalu me ko oko loa te fakafoiafia te tala tenei.
I ana pati me ka fakamanatu te aso tenei i tausaga taki tasi mo fai te aso o tafaoga o Tuvalu.
Ne faopoopo mai ne ia me e lasi kii tenna fakamoemoe ke galue fakatasi a ia, io me ko te TASNOC mo te ulu ofisa o NOC i Fiiti, kae maise i ei te lasi o te fesoasoani ka maua ne te fakapotopotoga i feitu tau tupe mo te atiakega o tafaoga i Tuvalu nei.
Ne iloa atu ne tala o Tuvalu me uke a fekau fakamaloo ko oti ne oko mai i ofisa o te Olympic, te ulu ofisa o te ONOC i Suva, fakatasi ei mo NOC o fenua e aofia i ei ko Guam, FSM, Cook Islands, Tonga, Costa Rica mo Samoa.
I pati a Nakibae me ka fakamanatu te aso tenei i se aso pili mai mua nei.
Palele
