Tuvalu seki toka o kau atu ki te PASO
Ne tusi ne Silafaga Lalua
A Tuvalu koi uke kii a mataupu koi tau o kilo ki ei koi tuai o kau atu ki te fakapotopotoga a fenua o te Pasefika ki liga i mea tau oloolo malaga i vakalele ko te PASO.
A Tuvalu ne kamigina ne te fakapotopotoga tenei ke fanatu pela me se tino fakalogologo i te fonotaga a latou ne fai i te masina ko teka i Canberra i Ausitalia, kae ne sui atugina ne te failautusi o te minisituli fesokotakiga mo oloolo malaga ko Tapugao Falefou.
PASO ko te fakapotopotoga e onoono ki luga i te lei o mea e fakateletele i ei a malaga vakalele a fenua o te Pasefika pela mo malae vakalele.
Tapugao ne fai mai ki tala o Tuvalu me koi uke a mataupu koi tau o kilo ki ei te malo Tuvalu koi tuai o kau atu ki te fakapotopotoga, e pela mo mea lei kola e tau o maua ne fenua e kau atu ki fakapotopotoga a fenua penei mo te PASO ? me pefea te lasi mo te taaua o te fakapotopotoga mo tatou.
Te mea taaua e ‘lave ei Tuvalu o kau atu ki te PASO ko te togi o te kau atu tela e aofaki ki te sefulu afe tupe Amelika tela i muna Tapugao me ‘mafa kii ki te malo.
Ne fai mai foki ne ia me ona la ko te galuega e fai ne te fakapotopotoga e lasi, kae maise foki ko tena ofisa se ofisa fou fatooo fakatuu ko ala i ei o taaua te togi tenei, mo fakatele te fakapotopotoga i tausaga e uke mai mua nei.
Ka fai e kau atu Tuvalu ki te PASO kae manako ki se fesoasoani o se tino poto ke vau konei,e togi foki loa ne ia te tino tenei kae e see mamaa tena togi i muna Tapugao.
Ne iloa atu ne tala o Tuvalu me i te fenua ko Naluu ko te toe fenua fou nei ke kau atu ki te PASO, ko avaka ei ne ia fenua e kau ki ei ki te sefulu lua.
Palele
