Malaga fakapitoa a te Manufolau mo tino masaki
Ne tusi ne Yvette D'Unienville
E tai katoa te tino fitu o tino masaki i fenua i te togaloto ko maua se olotou avanoaga o foki vave atu ki olotou fenua.
Te Manufolau kafai sena malaga fakapitoa ki fenua i te kogaloto i te aso taeao o fakafoki a tino masaki kolaa ne aumai ne te Minisituli o te ola lei ki Funafuti nei.
Te tokolua failautusi ite Minisituli o olomalaga Isaia Taape ne fai mai me ne fakaatoka ne te Minisituli ke fai se malaga penei mai luga i te fakatagi mai te Ministuli ote ola lei.
Te kilaaki ite fakaimasaki lasi a Tuvalu Lausei Mavelo ne fakapatonu mai ne ia me tino ono mo te tokovalu katoa a masaki konei ka olo i ite malaga ki fenua i te togaloto.
E aofia ia latou konei ko tino masaki loa kolaa ne aumai ki te fakaimasaki, e pelaa foki mo masaki o taliga, isu mo kato kolaa ne aumai kite tiimu o taliga, isu mo kato mai Ausitalia.
A te nofo o masaki konei i luga ite laumua ne panaki mo te Minisituli o te ola lei.
Te vaka tiaki ne ia te laumua i te afiafi o te Aso Gafua .
Ne iloa atu ne tala o Tuvalu i masaki foki ne aumai mai fenua ki Saute ne faimalaga atu ki olotou fenua tonu i te malaga a te Nivaga tenei ne tiakina neia te laumua i te Aso Lua.
Te tiimu fai mata ne eva atu ki Fiiti i te vakalele o te Aso Lua o te vaiaso nei.
Palele
