Minisita o tafaoga ko toe kilo ki te taumafaiga i te faiga tafaoga lasi a te Pasefika
Ne tusi ne Silafaga Lalua
Te minisita o tafaoga tena malu Dr. Falesa Pitoi ko toe kilo ki tua i te faiga tafaoga a fenua o te Pasefika i Samoa mo te taumafaiga a fanau Tuvalu i ei mo te molimau me koi lasi kii te mafai o fanaka te taumafaiga a latou i sose tafaoga.
I te faiga o tafaoga i muna Falesa me i tou tamaliki ne lei kii olotou tafao i tafaoga katoa kola ne olo i ei kae talitonu a ia me ko te kese o te enivalomene ne tafao i ei ne ala i ei o se lei te olotou taumafai.
I ana muna me i te tokoukega o tamaliki tafao seki maua aka loa se olotou avanoaga o fepaki mo niisi tino tafao mai niisi fenua tela la te faiga tafaoga i Samoa ne kese kii te natula tafao o latou mo te mea e masani ki ei.
Mai konei ne lasi foki loa i ei te tatooga o te taumafai a latou.
E fakamaloo atu te minisita mo taumafaiga katoa kola ne fai i Samoa kae toe fakamalosi atuy ki tamaliki tafao katoa ke fakasoko loa te olotou tafao mo olotou fakaakoakoga ko te mea ke mafai o fanaka foki tulaga o taumafaiga i sua faiga tafaoga i sua faa tausaga.
Te mea taua mai mea katoa konei ko te tausi ifo te tino tafao ki tena foitino mai te kava, pusi mo vailakau malosi manafai e manako ke fai pela me se tino tafao, me ka tumau mea konei ka se fanaka foki tulaga taumafai o sose tino tafao.
Ne fai aka foki ne tena malu Falesa me i tafaoga pela mo te alo vaka, mo vaega tafiti pela mo te judo mo te wrestling e mafai kii ne tou tino o fai.
I ana muna me i te kau atu o Tuvalu ki te Olympic ka aumai ei ne ia alaga tupe kola ka fesoasoani ki te atiakega o tafaoga i loto i Tuvalu nei.
Ne fakapatonu aka foki ei ne tena malu a te loto fesoasoani o te malo ki te avakaga o tafaoga i te atufenua.
Palele
