Te tamaliki fafine foliki ko ono ana tausaga telaa ne pukemaloo i te vaiaso ko teka
Ne tusi ne Yvette D'Unienville
Te keisi ote tamaliki fafine foliki ko ono ana tausaga telaa e fai pelaa me ne pukemaloo i te fenua ko Niutao ko nofo nei i lima o pulisimani.
Te Pule o Pulisimani Motulu Pedro ne fakaasi aka ne ia ki tala o Tuvalu, i te fakalavelave ne tupu i te vaiaso ko teka i taimi o faigaa mea o te aso fakamanatu ote fenua telaa ko te Aso o te Setema.
Ne fai mai foki ne Motulu ite tagata telaa e fai pelaa me ne fai ne ia te amioga se lei tenei e tausi nei ne pulisimani i Funafuti.
Te tamaliki fafine tenei ne tupu kiei a te fakalavelave ne aumai ne te ola lei ki Funafuti nei.
Ne fai mai ne te pule o te fakaimasaki ko te Tokita Stephen Homasi me ne aumai te tamaliki fafine tenei ki Funafuti ke fai se sukesukega fakalei ko te mea ke iloilo fakalei a tulaga o pakiaga kolaa ne oko kiei te tamaliki.
I ana pati me i vaegaa keisi penei ka fai pelaa me ne legal case ka avaka ki te tulafono telaa e tau foki loa o tusitusi fakalei a tulaga o pakiaga mo mea kolaa e mafai ne te fakaimasaki o fai ki luga i te tamaliki ko te mea ke mautinoa fakalei a te tulaga o te keisi mafai e tonu me avaka ki loto i se fono tulafono.
I ana pati foki me mai tafa iei o tulaga ki luga ki tulafono, e iloilo foki a tulaga o masaki pisi mai te moe fakatauvaga maise te selamete, se tasi o masaki e lasi te pisi mai luga i vaegaa case penei i tino kolaa e pukemaloo.
E pelaa mo pati a te Pule o Pulisimani, a te tagata telaa e tukutaumate me ne fai ne ia te amioga se lei tenei e tausi nei ne pulisimani.
Palele
